Mirça Rednikin gedişindən sonra baş məşqçi postunu tutan Cüneyt Biçərin əvvəlcə işləri yolunda gedirdi. İlk oyunlarda qələbələr qazanan cənub təmsilçisinə gözünün üstə qaşın var deyən yox idi. Amma nəticələr getdikcə pisləşdi. Belə ki, əvvəlcə səfərdə “Qəbələ”yə uduzan “Xəzər Lənkəran” ardından Quzanlı səfərindən əliboş qayıtdı. Komanda dünən isə “Şəfa” stadionunda “İnter”ə məğlub oldu.

Artıq bu nəticələr bir qrup azarkeşin səbir kasasını daşdırıb. Belə ki, onlar çıxış yolunu Cüneyt Biçərin istefasında görərək, gənc məşqçini postundan getməyə çağırıblar. İstefa şüarları altında avtobusa minən Biçər azarkeşlərin bu hərəkətinə qarşılıq sadəcə, gülümsəyib.