"Xəzər Lənkəran"ın müdafiəçisi Elnur Allahverdiyevin müsahibəsi

- Elnur, ilk növbədə "İnter"lə qarşılaşma haqda fikrin necədir?
- Gərgin və maraqlı oyun oldu. Komandamız hesabda irəlidə olduğu halda sonda məğlubiyyətlə üzləşdi. Buna layiq deyildik. Məğlubiyyət mənə çox pis təsir etdi. Heç vaxt uduzmağı qəbul edə bilmirəm. Çalışıb məğlub olmamaq lazım idi. Komanda uduzubsa, hamı məsuliyyət daşıyır, günahkardır.

- Bu oyunda yerin görünürdümü?
- Əvəzedilməz futbolçu yoxdur. Komandamızda məndən savayı 25 futbolçu var. Mənə deyə bilmərəm ki, meydanda olsaydım məğlub olmayacaqdıq. Hər şeyi oyun göstərir.

- Sənin mövqeyində çıxış edən futbolçu yaxşı oynadı?
- Müdafiədə yaxşı oynanılsaydı, məğlub olmazdıq.

- Qapıçı Kamal Bayramov da səhvlərə yol verir. Səncə, Kamran Ağayev olsaydı, inamlı oynayardı?
- Konkret olaraq Kamalı günahkar hesab etmək düzgün deyil. Hər kəs səhvinə görə cavab verir.

- Komandanızda nə çatmadı?
- Komandamız aqressiv oyun və öz gücünü lazımi səviyyədə göstərməyi bacarmadı. Futbolçularımız buraya qələbə dalınca gəldiklərini sübut edə bilmədilər. Komandamız oyun zamanı daha çox müdafiədə oturdu ki, nəticədə qapımızda üç qol gördük.

- Məğlubiyyətdə əsasən baş məşqçinin günahı var?
- Bu haqda mən nəsə deyə bilmərəm. Buna görə bütün kollektivin günahı var. Oyunun videoyazısına baxılacaq, təhlil olunacaq.

- Mərhələ keçmək şansını necə dəyərləndirirsən?
- Səfərdə iki qol vurmaq yaxşıdır. Hesab edirəm ki, yarımfinala vəsiqə qazanmaq şansımız çoxdur. Cavab oyununda bu məğlubiyyətin əvəzini çıxmağa borcluyuq.

- Çempionatda "Qarabağ"a məğlubiyyətdən sonra "Xəzər Lənkəran" rəhbərliyinin baş məşqçi və futbolçulara ciddi xəbərdarlıq etdiyi bildirilir.
- Hazırda zədə ilə əlaqədar müalicə olunuram. Bundan xəbərim yoxdur. Ancaq məncə belə şey olmayıb. Klub rəhbərliyi heç vaxt belə addım atmır.

- Premyer Liqadan nə gözləyirsən?
- 5 xallıq fərqi aradan qaldırmaq mümkündür. Fikrimcə, çempion olmağa 4 komanda - "Neftçi", "İnter", "Xəzər Lənkəran" və "Qarabağ"ın şansı var.

- Özün nə vaxt meydana qayıdacaqsan?
- İnşallah, martın 24-də “Neftçi” ilə baş tutacaq oyuna hazır olaram.