“Xəzər Lənkəran” klubunun yeni baş məşqçisi Yunis Hüseynovun müsahibəsi

- “Xəzər Lənkəran” klubunun baş məşqçisi olmağı sizə kim təklif etdi?
- Klub rəhbərliyi.

- Konkretləşdirsək...
- Klub prezidenti Mais Mənsimovun tapşırığı ilə vitse-prezident Tuyqun Nadirov mənimlə əlaqə saxladı.

- Artıq zəng olunanda söhbətin nədən getdiyini bildiniz, yoxsa ofisə dəvət etdilər?
- Belə bir fikir söylədilər. Amma danışıqları aparmaq üçün ofisə dəvət etdilər. Danışdıq, razılığa gəldik.

- Bu zəngi çoxdan gözləyirdiniz?
- Nə mənada?

- Hər halda, iki ildir ki, işsiz idiniz...
- Hardasa gözləyirdim. Çünki işsiz məşqçi hər zaman dəvətlərin gələcəyinə ümid edir. Düşünürəm ki, yaxşı olacaq.

- Niyə məhz iki illik müqavilə imzaladınız?
- Bunun ciddi bir səbəbi yoxdur. Qarşılıqlı razılaşma əsasında iki illik müqaviləyə qol çəkdik. Biz ilk ildəcə həm Azərbaycan çempionu olub, həm də kuboku qazanmağa çalışacağıq. Maliyyə şərtləri barədə danışmaq isə istəmirəm. Çünki bunlar müzakirə olunmur.

- Müqavilədə hər hansı bir özəl şərt varmı?
- Adi müqavilədir. Düşnürəm ki, biz işimizi istədiyimiz kimi görəcəyik.

- Çempionluq və kubokdan danışdınız. Amma nə heyəti siz qurmusunuz, nə də hazırlıq mərhələsində iştirak etmisiniz. Bu mənada çətinliklə üzləşəcəyinizdən çəkinmirsiniz?
- Hər iş çətindir. Sadəcə, qarşıya məqsəd qoyub, ona doğru irəliləmək lazımdır.

- Komandaya ilk məşqinizi nə vaxt keçəcəksiniz?
- Bu gün, saat 17:00-da, Lənkəranda!

- Heyətdə xüsusi rəğbət bəslədiyiniz oyunçu varmı?
- Hamısı mənim üçün eynidir. Hamına hörmət edirəm və inanıram.

- “Xəzər Lənkəran”da işləmək hər məşqçi üçün çətindir. Çünki bu komandanın azarkeşləri heç də bütün məşqçiləri sevmirlər...
- Düşünürəm ki, aramızda ciddi problem olmayacaq. Onların məni əla qarşılayacağına inanıram.

- “Xəzər Lənkəran” təlim-məşq toplanışının çox hissəsini Bakıda, yoxsa Lənkəranda keçəcək?
- Mənim bölgədə yaşamaqla bağlı problemim yoxdur. Komanda yəqin ki, ilin böyük hissəsini Lənkəranda olacaq.