"Qarabağ"da qopmalar davam edir. Hələ mövsüm yekunlaşmamış "Neftçi" ilə anlaşan Rəşad Sadiqovun ardından daha 3 futbolçu Ağdam klubunu tərk edib.

Makedoniyalı yarımmüdafiəçi Nderim Nedzipi növbəti mövsümdə əyalət klubunun şərəfini qorumayacaq. Onun getməsinə isə müqaviləsinin müddətinin başa çatması səbəb olub. Baş məşqçi Qurban Qurbanov əcnəbi futbolçunun xidmətinə ehtiyac duymayıb. Qapıçı Boyan Pavloviçin xidmətinə də ehtiyac duyulmayıb.

Nedzipidən fərqli olaraq, "Qarabağ"ın liderlərindən olan Georgi Adamiya öz istəyi ilə komandadan ayrılıb. Gürcü futbolçu Ağdam klubu ilə başa çatan müqaviləsinin müddətini uzatmayaraq həmyerlisinin yanına - Kaxaber Tsxadadzenin "İnter"inə yollanmaq niyyətindədi. Bu barədə məlumat verən Adamiya artıq "Qarabağ"la bağlılığının qalmadığını söyləyib: "Artıq "Qarabağ"dan getmişəm. Bu klubla müqaviləm başa çatdı və yeni anlaşma imzalamadıq".

Hazırda vətəni Gürcüstanda olan 31 yaşlı hücumçu 2010-cu ilin qışından şərəfini qoruduğu Ağdam təmsilçisi ilə yollarını rəsmən ayırdığını bildirib. Onun sözlərinə görə, yeni müqavilə ilə bağlı razılığa gələ bilməyiblər: "Müqaviləm bitdiyindən bu klubla bağlılığım qalmayıb. "Qarabağ" Avroliqaya düşmək uğrunda mübarizə aparırdı. Ancaq buna nail bilmədik. Bunun səbəbləri ilə bağlı geniş təhlil etdikdən sonra fikir bildirmək olar".

Adamiyanın karyerasını "İnter"də davam etdirəcəyi gözlənilir. O, həmyerlilərinin çoxluq təşkil etdiyi bu klubdan ona maraq olduğunu gizlətməyib: "İnter" məni heyətində görmək istəyir və keçidlə bağlı danışıqlar aparırıq. Ancaq indi 100 faiz deyə bilmərəm ki, məhz bu komandaya keçəcəyəm. Buna qarşıdakı günlərdə aydınlıq gələcək. "İnter" gələcək karyeramla bağlı variantlardan biridi. Əlbəttə, burada həmyerlilərimin çox olmağı, "Qarabağ"dan fərqli, "İnter"in Avroliqada oynamağı seçimimə təsir edə bilər. Uzun müddətdi Azərbaycanda oynadığımdan karyeramı burada davam etdirmək istərdim. Ola bilər ki, xaricdə oynayım. Ancaq hazırda əsas diqqətimi Azərbaycan klubuna keçməyə yönəltmişəm".

Qeyd edək ki, Adamiya 2005-ci ilin qışından fasiləsiz olaraq ölkəmizdə çıxış edərək, "Qarabağ"a qədər şərəfini qoruduğu "Neftçi" və "Bakı" ilə çempion olub. O, ağdamlıların heyətində oynadığı ilk 2 ildə bürünc medal qazanıb, ötən mövsüm premyer-liqamızın bombardiri olub.

Bu arada Avroliqada mübarizə aparacaq "İnter" islahatlara başlayıb. Paytaxt təmsilçisi müqaviləsi bitən legionerlərdən çexiyalı Bronislav Çervenka, latviyalı Girt Karlson, braziliyalı Danildo Assioli və bolqarıstanlı Enyo Krastovçevlə yollarını rəsmən ayırıb.

Komandanın meneceri Səbuhi Səfiyarlı "İnter"i tərk edən futbolçularla bağlı bunları deyib: "Krastovçev və Karlsonla müqavilənin müddətini artırmadıq. Artıq uzun müddətdi ki, "İnter"də oynayan Çervenka da gələn mövsüm bizimlə olmayacaq. Bundan əlavə, müdafiəçi Danildo Assioliyə də xidmətlərinə görə təşəkkür etdik. "Simurq"da icarədə çıxış edən Ruslan Poladovu isə geri qaytarmaq niyyətimiz yoxdu. Bundan əlavə də gedənlər ola bilər. Baş məşqçi Kaxaber Tsxadadze hələ ki, Elnur Abdulov, Peter Çrappan və Xəyal Mustafayevlə bağlı qərar verməyib".

Yeri gəlmişkən, Avroliqaya vəsiqə qazanan "İnter"in futbolçuları istirahətə buraxılıb. "Bank klubu"nda tətil iyunun 1-dək davam edəcək. Yayın ilk günündə komanda Türkiyədə bir araya gələcək və qardaş ölkədə iyunun 12-dək davam edəcək təlim-məşq toplanışı keçirəcək. İlk toplanışın başa çatmasından sonra futbolçulara 3 günlük istirahət veriləcək. "İnter" iyunun 15-də yenidən toplaşacaq və 2-ci təlim-məşq toplanışına yollanacaq. Toplanışın keçiriləcəyi yer hələlik dəqiq məlum deyil. Ancaq "İnter"in Avropa ölkələrindən birinə yollanacağı gözlənilir. İkinci toplanış iyunun 29-dək davam edəcək.