Futbol üzrə Unibank Premyer Liqasında XIX turun oyunlarının baş tutması sual altına düşüb. Qarşıdakı tura fevralın 10-da 2 görüşlə start verilməli, daha 4 matç isə ertəsi gün keçirilmədir.

Amma hələ də oyunların başlama saatı və yeri açıqlanmayıb. Buna səbəb kimi havaların kəskin soyuması göstərilir. Fevralın 7-də səhər saatlarından baş verən iqlim dəyişikliyinin üç gün davam edəcəyi bildirilir. Güclü qar yağacağı, şaxta olacağı, yolların buz bağlayacağı gözlənilir.

Peşəkar Futbol Liqasının prezidenti Ramin Musayev bütöv bir turun təxirə salınmasının gündəmdə olmadığını söyləyib. Musayevin sözlərinə görə, təxirəsalma stadionlardakı vəziyyətdən asılı olacaq: “Turun bəzi görüşləri süni örtüklü meydançalarda keçiriləcək. Belə meydançalardan qarı təmizləmək çətindir. Çünki süni örtük zədələnə bilər. İndidən konkret qərar verə bilmirik. Meydançaların durumunun oyun keçirmək üçün əlverişsiz olmasına dair hər hansı bilgi alsaq, matçı təxirə sala bilərik. Amma hələlik bizə belə bir məlumat verilməyib”.

Kəskin hava şəraiti fevralın 9-da günorta saatlarınadək davam edəcək. Bu isə o deməkdir ki, təxirə salınma olarsa, daha çox ertəsi gün keçiriləcək oyunlara şamil edilə bilər. Başqa sözlə, AZAL – “Sumqayıt” və “Qarabağ” – “Simurq” matçlarının keçirilməməsi mümkündür. Bu oyunlardan birincisi Bakının Şüvəlan qəsəbəsindəki süni örtüklü AZAL stadionunda, digəri isə Ağdamın Quzanlı qəsəbəsindəki Olimpiya Kompleksinin təbii ot örtüklü meydançasında baş tutmalıdır.

AZAL-ın mətbuat katibi Eldəniz Yusifov meydançanın qardan təmizləndiyini və hazırda oyunun təşkili üçün heç bir problemin olmadığını söyləyib. Lakin onun fikrincə, əlverişsiz hava şəraiti yaransa, matçın təxirə salınması üçün PFL-ə müraciət etməyə ehtiyac qalmayacaq: “Yəqin ki, bu halda PFL-in özü mövcud vəziyyəti nəzərə alacaq”.

“Qarabağ”ın baş direktoru Əmrah Çelikəl isə bildirib ki, hazırda Ağdamda da yağıntılı hava şəraiti müşahidə edilir, lakin meydança oyun üçün yararsız vəziyyətdə deyil: “Hələlik matçın təxirə salınması üçün müraciət etməyimizə bir səbəb yoxdur. Amma ehtiyac yaransa, PFL-ə baş vuracağıq”.

Qeyd edək ki, təqvimə əsasən, fevralın 11-də Tovuzda “Turan” – “Xəzər Lənkəran”, Gəncədə “Kəpəz” – “Qəbələ”, paytaxtda isə “İnter” – “Rəvan” və “Bakı” – “Neftçi” matçları keçirilməlidir.