Böyükağa Hacıyevin gəlişindən sonra “Neftçi”nin əsas heyətinin məşqçilər korpusunda dəyişikliklər baş verdi. Veteran futbolçular Tərlan Əhmədovla Kamal Quliyevi komandaya cəlb edən Hacıyev fiziki hazırlıq üzrə məşqçi Mehmet Akla əməkdaşlığa son qoydu.

Əsas heyətdən uzaqlaşdırılan Ak aşağı yaş qrupunda qısamüddətə fəaliyyət göstərsə də, sonradan bu iş də baş tutmadı.

Özünün dediyinə görə, 2013-cü ilə qədər klubla müqaviləsi olan Ak bir növ havada qaldı. Əvvəlcə 1 aya yaxın Türkiyədə gözləmə mövqeyi tutan Ak cəhdlərinin nəticəsiz qaldığını görərək ağır bir işə əl atıb.

Belə ki, gənc mütəxəssis işdən dünyanın ən ali qrumu FİFA-nı da xəbərdar etməyi vacib bilib. Ak məsələ ilə bağlı artıq FİFA-a şikayət məktubu göndərib. Akın tələbi ilə əlaqədar olaraq, “Neftçi”yə bildiriş məktubunun daxil olması gözlənilir.

“Neftçi” klubunun vitse-prezidenti Tahir Süleymanovun münasibəti isə bir qədər fərqli olub. Həmişə təfərrüatları ilə danışmağı xoşlayan Süleymanov məsələni bir cümlə ilə izah edib: “Klubla müqaviləsi qüvvədə olan AK ötən ilin sonlarında klubun düşərgəsini tərk edib və geri qayıtmayıb”.

Qeyd edək ki, Azərbaycanda “Neftçi”dən başqa Qarabağda da işləmiş Ak həm ölkə kubokunun qalibi, həm də Azərbaycan çempionatının qızıl medalçısıdır.