"Neftçi"nin məşqçisi Mehmet Akın klubu FIFA-ya şikayət etdiyi haqda xəbər çıxmışdı. Mövzuyla bağlı açıqlama verən klubun Mətbuat və İctimaiyyətlə Əlaqələr Departamentinin rəhbəri Elnur Əşrəfoğlu gənc türkiyəli mütəxəssisi ittiham edərək şikayət etməzdən əvvəl kluba bu haqda xəbər verməli, əvvəlcə problemi klub rəhbərliyinə bildirməli olduğunu qeyd etmişdi.

Bildirək ki, Mehmet Böyükağa Haciyevin baş məqçi təyin olunmasından bir müddət sonra köməkçi məşqçi vəzifəsindən uzaqlaşdırılmışdı. O, "Neftçi"nin aşağı yaş komandaları üzrə kurator və məşqçi vəzifəsinə təyin olunmuşdu. Lakin klubun onunla münasibətləri rəsmiləşdirmədiyi məlum idi.

Bəs görəsən FIFA-ya niyə şikayət edib? Mehmet Ak əvvəlcə xəbəri təkzib edib bildirdi ki, bu haqda heç yerə açıqlama verməyib. Bunu onun adından uydurublar. FIFA-ya şikayət etmədiyini deyən Ak həm də Elnur Əşrəfoğlunun açıqlamasına münasibət bildirdi:

"Elnur bəyə hörmətim var, Azərbaycanın sayılan media nümayəndələrindən biridi. Ancaq verdiyi açıqlama sadəcə, gülməli idi. Təşəkkür edirəm, mənim reklamımla məşğul olub. Hər halda, reklama ehtiyacım yoxdu, amma o bu işi görüb. Özünə danışmağa mövzu tapıb deyəsən. Ona sadəcə iki mövzuda cavab verəcəm, başqa mövzularda cavab haqqımı istifadə etməyəcəm.

Mənim "Neftçi"yə gəlmək üçün klub rəhbəri Sadıq Sadıqova yalvardığımı deyib. Halbuki Sadıqovla danışanda o yemək-içməklə məşğul idi, bizim yanımızda deyildi. Elnurdan başqa "Neftçi"yə aid 5 nəfər də var idi orda. Ancaq Elnur yox idi. Demək, o açıqca böhtan atır.

Bundan başqa, 1 aydı yoxa çıxdığımı deyir. Hadisələri əməlli-başlı qarışdırıb. Mən 1 aydı Türkiyədəyəm. Telefonda həm Sadıq müəllimlə, həm klub rəsmiləri Tahir Süleymanov və Güloğlan bəylə (Cabbarov red.) danışmışam.

Olanlardan xəbəri yoxdu, amma rahatca üstümə şər atır. Əgər mənim olmamağım klub adına onu çox narahat etmişdisə, klub rəsmisi kimi bir dəfə olsun, zəng edib maraqlana bilərdi. Etməyib, ancaq deyir Mehmet Ak qaçıb.

Mən Sadıq müəllimə həmişə hörmətlə yanaşmışam. Bəli, məni kluba o gətirib, bunu hər kəs bilir. Ancaq işlər dəyişdikcə, başqa-başqa söhbətlərin ortaya çıxmasını düzgün saymıram. Bunlar doğru hərəkət deyil.

Onsuz klub rəhbəri belə ucuz şeylərlə məşğul olan deyil. Doğrudan da çox yaxşı insandı. Başı çox qarışıqdı, bilirəm, anası rəhmətə gedib, Allah rəhmət eləsin. Ona zəng edib, başsağlığı vermişəm.

Sadıq müəllim mənə bir söz verib, ona əməl edəcəyini gözləyirəm. Qalan kim nə danışır, danışsın. Ancaq yaxşı olar mənimlə bağlı sualı olan özümə zəng edib soruşsun, mətbuatda çıxış edib, adımdan istifadə edərək gündəmə gəlməsin".