Bu gün AZAL rəhbərliyi ilə məşqçilər korpusu arasında görüş keçirilib. Görüşdə baş məşqçi Rafiq Mirzəyev və onun köməkçiləri komandadan getmək istədiklərini rəhbərliyə çatdırıblar.

Hələ ölkə kubokunun 1/4 final mərhələsinin “Bakı” ilə martın 28-dəki cavab oyunundan sonra komandanı tərk etmək istəyən çalışdırıcılar komandanı çətin vəziyyətdə qoymamaq üçün dünənki matçı da yola verməyə razı olublar. Zaqatalada “Simurq” üzərində 2:1 hesablı qələbədən sonra isə onlar komandadan qalib kimi ayrılmaq qərarına gəliblər.

Belə ki, onlar rəsmi ərizə ilə müraciət edərək tutduqları vəzifədən istefa verdiyini bildiriblər. Klub rəhbərliyi isə onların istefasını qəbul edib. AZAL-ı mövsümün qarşıdakı oyunlarına kimin çıxaracağı isə yaxın günlərdə məlum olacaq.