Bir neçə gün öncə baş məşqçi Rafiq Mirzəyevi və bütün köməkçilərini istefaya göndərən AZAL hələ də seçimini etməyib. Məşqləri əvəzedici heyətin çalışdırıcısı Mais Əzimov keçsə də, yeni təyinatın tezliklə reallaşacağı sirr deyil.

Dünən isə İqor Ponomaryovun AZAL-ın baş məşqçi postuna gətiriləcəyi haqda xəbər yayıldı. "Neftçi"nin veteran futbolçusunun Bakıya gəlməsini eşidən bəzi həmkarlarımız onun məhz "təyyarəçilər"i çalışdıracağını ehtimal edib.

Ancaq vaxtilə milli komandamızda, eləcə də "Qarabağ" və "Xəzər Lənkəran"da işləmiş Ponomaryov xəbərləri təkzib edib: "Mən AZAL-ın baş məşqçisi təyin olunmamışam. Bakıya səfərim şəxsi işlərimlə bağlıdı".

Uzun illərdi İsveçdə yaşayan 52 yaşlı olimpiya çempionumuz növbəti dəfə Bakıya gəlib. Elə gəlişi ilə də AZAL-a baş məşqçi "təyin edilib". Haqqında yayılan xəbərləri təəccüblə qarşılayan Ponomaryov təyinatının həqiqət olmadığını bildirir: "Mən bura yaxınlarımı, anamı görməyə gəlmişəm. Hər halda, Azərbaycan mənim doğulduğum məkandı və vətənimə baş çəkməyim normal şeydi. Əlbəttə, burada işləmək istərdim və bunu bir neçə dəfə bildirmişəm. Yenidən Azərbaycanda işləmək mənim üçün xoş olardı. Ancaq hazırda belə bir şey yoxdu. Mənim özümə də belə vəziyyətin yaranmağı xoş deyil. Belə ki, hər dəfə Bakıya gələndə hansısa baş məşqçini qovub, məni onun yerinə "təyin edirlər". Bunadək adım "Abşeron"da, "Sumqayıt"da hallandırıldı. Ancaq göründüyü kimi, bu, real olmadı. Mənim AZAL-ın rəhbərliyi ilə danışığım, görüşüm olmayıb. Bura onların dəvəti ilə də gəlməmişəm. Ümumiyyətlə, hesab edirəm ki, AZAL Rafiq Mirzəyevdən imtina etməklə düzgün addım atmadı. Adam normal işləyirdi, çalışırdı. Ona vaxt vermək lazım idi. Amma bunu etmədilər. Ümumiyyətlə, Azərbaycan klubları anlaşılmaz qərarlar qəbul edirlər. Əcnəbi baş məşqçi gətirirlər, onun üçün hər cür şərait yaradırlar, vaxt verirlər. Amma eyni şeyləri azərbaycanlı mütəxəssislərə münasibətdə görmək olmur".

AZAL da Ponomaryovun təyinatını təkzib edib. Klubun mətbuat xidmətinin rəhbəri Eldəniz Yusifov bildirib ki, hazırda əsas komandanı Mais Əzimov çalışdırır.