“Qəbələ” futbol klubu komandanın sabiq baş məşqçisi Toni Adamsla işbirliyini davam etdirəcək. İngiltərə “Arsenal”ının əfsanəsi “Qəbələ”nin prezidenti Tale Heydərovun müşaviri vəzifəsini yerinə yetirəcək.

Toni Adams yeni təyinatdan sonra “gabalafc.az”a eksklüziv açıqlama verib: “Mən “Qəbələ”dəki yeni vəzifəmə görə çox şadam. Klubun prezidenti cənab Tale Heydərovla belə bir razılığa gəldik ki, mənim futbol biliyimi və klubun inkişafının hazırkı mərhələsini nəzərə alaraq, fəaliyyətim meydançadan kənarda daha çox faydalı ola bilər. Prezidentin müşaviri kimi mən klubdakı vəzifələrimi uğurla yerinə yetirməyə çalışacağam və “Qəbələ”nin sadəcə Azərbaycanda deyil, Avropada da sayılıb-seçilən, qabaqcıl, bir sözlə peşəkar kluba çevrilməyində köməkliyimi əsirgəməyəcəyəm. Mənə bu cür etimad göstərdiyinə və klubdakı məqsədlərimin reallaşması üçün şərait yaratdığına görə klubun Prezidentinə minnətdaram”.

Qeyd edək ki, Toni Adams 2010-cu ilin mayından 2011-ci ilin noyabrınadək “Qəbələ”nin baş məşqçisi vəzifəsinin yerinə yetirib.