“Xəzər Lənkəran” klubunun Unibank Premyer Liqasında bu mövsüm topladığı xallardan 6-sı silinə bilər.Bu barədə FİFA qərar çıxarıb.

Səbəb kimi 2008-2009-cu il mövsümündə transfer olunan Romula Silvano Da Silvaya “Xəzər Lənkəran” rəhbərliyinin 114 min dollar borclu qalması göstərilib. Romulo FİFA-ya şikayət edib. Ali futbol qurumu isə 36 yaşlı hücumçunun iddiasını təmin edib. Klubun isə 6 xalının silinməsi qərara alınıb.

“Xəzər Lənkəran”ın mətbuat katibi Yalçın Əliyev açıqlamasında 6 xalın silinməsi haqda kluba heç bir məlumatın daxil olmadığını bildirib. Onun sözlərinə görə, bu barədə xəbərdarlıq vaxtilə FİFA-dan edilib: “Ali futbol qurumu bizə bildirmişdi ki, Romulo Silvano da Silva ona borclu olmağımızla bağlı şikayət ünvanlayıb. Borcumuzu ödəməsək, hesabımızdan 6 xalın silinəcəyinə dair xəbərdarlıq da edilmişdi. Biz də həmin borcu ödədik və bu barədə FİFA-ya lazımi sənədləri göndərdik. FİFA-nın hesabımızdan 6 xalın silinməsinə dair qərarı barədə bizə heç nə deyilməyib”.

Qeyd edək ki, Unibank Premyer Liqasında 27 turdan sonra “Xəzər Lənkəran” 51 xalla 2-ci pillədə qərarlaşıb. 6 xal silinəcəyi halda, klub 45 xalla 4-cü pilləyə enəcək. Bu isə o deməkdir ki, Azərbaycan Kubokunda mübarizəni dayandıran Lənkəran təmsilçisi Premyer Liqanın mükafatçısı kimi Avropa kuboklarına qatılma şanslarını da itirə bilər.