Aprelin 26-da “Xəzər Lənkəran” klubuna FİFA İntizam Komitəsi tərəfindən məktub ünvanlanıb. Məktubda “Xəzər Lənkəran” tərəfindən futbolçu Romulo Silvano Silvaya edilən ödənişin təyin olunmuş əlavə müddət ərzində ödəndiyi və FİFA İntizam Komitəsinin AFFA-ya klubdan 6 xal silinməsi barədə verdiyi sorğunun səhv olduğu vurğulanıb. Bununla da, adıçəkilən məktubda FİFA İntizam Komitəsi həmin sorğunun icrasının AFFA tərəfindən ləğv edilməsi və “Xəzər Lənkəran”ın 6 xalının dərhal bərpa edilməsini AFFA-dan tələb edib:

Məktubun mətnindən çıxarış:

“Diqqətinizə çatdırırıq ki, bizə məlum olduğuna görə “Xəzər Lənkəran” FK tərəfindən oyunçu Romulo Silvano Silvaya ödənilməli olan qalıq məbləğ klub tərəfindən 30 mart 2012-ci il tarixdə ödənilib ki, bu da ödənişin kreditor tərəfindən 13 mart 2012-ci il tarixli məktubda qoyulmuş tarix çərçivəsində həyata keçirildiyi deməkdir. Orada tərəfimizdən məktubun qəbul edilməsindən 3 həftə sonra klubdan xalların çıxılması tələb edilib. Bununla da, xalların silinməsi etdiyimiz sorğunun səhvən və kreditor tərəfindən qoyulmuş müddətdən əvvəl edildiyini bildiririk. Yuxarıda qeyd edilənləri nəzərə alaraq AFFA-dan xalların silinməsi barədə etdiyimiz sorğunun icrasının ləğv edilməsini və “Xəzər Lənkəran”ın silinmiş 6 xalını dərhal bərpa etməsini tələb edirik. Bundan əlavə qeyd edirik ki, bu məktubun surəti İdman Arbitraj Məhkəməsinə CAS/2012/A/2774 saylı işlə əlaqədar göndəriləcək. Sonda bütün məbləğin kreditorun təyin etdiyi müddət çərçivəsində sonuncuya ödənilməsini nəzərə alaraq, sizə məlumat veririk ki, bu məsələ üzrə iş tərəfimizdən yekunlaşdırılır. Diqqətinizə görə təşəkkür edirik və yaradılan hər hansı bir narahatçılığa görə təəssüf etdiyimizi bildiririk”.


Bununla da, “Xəzər Lənkəran” bu məsələdə haqlı tərəf olduğunu rəsmən sübut edib və FİFA İntizam Komitəsi də öz məktubunda bunu təsdiqləyib.