“Xəzər Lənkəran” klubunun hesabından altı xalın silinməsi bir absurd, yenidən həmin xalların geriyə qaytarılması başqa absurddur. Bu, bizim bütün planlarımızı pozdu. FİFA-nın altı xalı silməklə bağlı qərarından sonra biz “Qəbələ” və “Bakı” ilə oyunlarda vabank getdik. Əgər “Xəzər Lənkəran”ın xal durumu əvvəlkitək olsaydı, normal oyunumuzu oynayardıq”.

Bu sözləri “Qarabağ”ın müdafiəçisi Rəşad Sadıqov FİFA-nın “Xəzər Lənkəran”nın altı xalını geri qaytarması qərarına münasibət açıqlayarkən deyib.
O qeyd edib ki, FİFA “Xəzər Lənkəran”ın altı xalını sildikdən sonra taktikalarında müəyyən dəyişiklik ediblər: “Biz müdafiədən oyunumuzu qurub ən azı bir xal qazanmağı hədəfləyərdik. FİFA-nın son qərarı düzgün olmadı. “Bakı” ilə oyunda bir neçə futbolçumuza istirahət verdik. Yenə deyirəm, bütün planlarımız alt-üst oldu”.

“Mən əvvəlki müsahibələrimdə də demişəm ki, hamı çempionluqdan danışır. Amma ola bilər ki, “Qarabağ” Avroliqadan kənarda qalsın. İndi isə üçüncü pillədəki “İnter”lə iki xal fərqimiz var. Bizi qarşıda üç ağır oyun gözləyir. Bu oyunlarda qələbə qazanıb Avroliqaya vəsiqəni təmin etməyə çalışacağıq” - deyə o qeyd edib.