Neftçi”nin baş məşqçisi Böyükağa Hacıyevin müsahibəsi

- Şəxsən siz Əhməd Kadırovun xatirəsinə həsr olunmuş beynəlxalq futbol turnirinə nə dərəcədə ciddi yanaşırsız?
- Çox ciddi. Orda da Azərbaycan futbolundakı inkişafı göstərməliyik. Özü də digər klublarla müqayisədə bizdə legioner futbolçular azdı. Çalışacağıq ki, “Neftçi” ölkəmizi bu turnirdə layiqincə təmsil etsin.

- Hədəfiniz nədi?
- Əlbəttə ki, qarşımıza ən yüksək hədəfləri qoymuşuq. Finala çıxmağı arzu edirik.

- Buna qədər Antalyada üç oyun keçirmişdiniz. Keyfiyyət sizi qane edir?
- Əgər biz qarşımıza qələbə qazanmaq vəzifəsini qoysaydıq, bu hədəfimizə çatacağımıza şübhə etmirəm. Sadəcə, həmin oyunlar vaxtı biz daha çox fiziki hazırlıqlara fikir verirdik. Həmin oyunlara futbolçular yorğun çıxmışdılar. Belə olanda çatışmazlıqlar daha çox diqqət çəkir.

- Premyer Liqadakı digər rəqiblərinizi də izləyirsiz?
- Yalnız “Bakı”nı görə bilmişəm. Onlar çoxlu transferlər edirlər. Amma unutmayın ki, futbolçunun uyğunlaşması üçün 5-6 ay lazım gəlir.

- “Neftçi” artıq yeni futbolçu almayacağını qətiləşdirib?
- Xeyr, mənə heç kim lazım deyil. “Neftçi” necə başlamışdısa, elə də davam edir.

- “Bakı”nın futbolçuları artıq indidən “Neftçi” üzərində qələbəyə kökləniblər...
- “Bakı”nın əsas problemi ondadı ki, komandadan çoxlu futbolçu gedib. Bu, klubun stilinə və büdcəsinə mənfi təsir göstərir. “Neftçi”ni məğlub etmək üçün “Bakı” gecə-gündüz məşq etməlidi. Bu, yalnız onlara yox, bütün rəqiblərimizə aiddi. Odu ki, “Xəzər Lənkəran”, “İnter” və “Bakı”ya üzümü tutub deyirəm ki, gecə-gündüz məşq edin!

- Demək istəyirsiz ki, qarşıdakı oyunlar üçün heç bir plan qurmursuz?
- İnanın ki, yox. Düşünürəm ki, hələ buna tezdi. Fevralın 10-dan sonra düşünmək olar. Çünki bir şey haqda çox düşünəndə, o arzunu həyata keçirmək çətinləşir.

- Siz, əminsiz ki, “Neftçi” çempion olacaq?
- Hər şey Tanrının əlindədi. Bizi böyük marafon gözləyir. Şadam ki, bizə ciddi yanaşırlar. Mən hələ rəqiblərimizə “Neftçi”ni dayandırmaq üçün yeni variantlar tapmağı da məsləhət görürəm. Sizə bir sirr açım: “Neftçi” yeni taktikayla oynayacaq. Onlar onu anlayıb, analiz edənə qədər, çempionat başa çatacaq. Biz öz yolumuza davam edirik.