"Neftçi" PFK Çeçenistan Respublikasının mərhum prezidenti Əhməd Kadırovun xatirəsinə həsr olunmuş beynəlxalq turnirdə ikinci oyununu keçirib. Flaqman Polşanın “Poloniya” klubu ilə qarşılaşıb. Görüş 3:1 hesabı ilə flaqmanın xeyrinə başa çatıb. “Ağ-qaralar”ın heyətində Bahodir Nasimov (dəq.22, 39) və Cavid İmamverdiyev (dəq.90) fərqlənib.

"Neftçi"nin start heyəti: Rauf Mehdiyev, Rail Məlikov, İqor Mitreski, Ruslan Abışov, Slavço Georgiyevski, Cavid Hüseynov, Mirhüseyn Seyidov, Rəşad Abdullayev, Denis Silva, Ruslan Əmircanov, Bahodir Nasimov.

Qeyd edək ki, qrupun digər oyununda “Paxtakor” “Metallist”i penaltilər zərbəsi sonrası üstələyib - 1:1 (4:3). Bununla da 2 turdan sonra komandaların dördü də 3 xal toplayıb. “Neftçi” növbəti oyununu fevralın 1-də “Paxtakor”a qarşı keçirəcək.
 

Böyükağa Hacıyev (“Neftçi”nin baş məşqçisi): “Metallist" klubu ilə oyunda məğlub olduğumuza görə bu matçda mütləq qələbə qazanmalı idik. Futbolçuları "Poloniya" ilə oyuna psixoloji cəhətdən yaxşı hazırlamışdıq. Gördünüz ki, bu matçda da gənclərə şans verdik. Qarşıdakı oyunlarda da onların xidmətindən yararlanacağıq. Hal-hazırda qrupumuzda bütün komandaların 3 xalı var. Şanslar bərabərdir. Çalışacağıq ki, növbəti oyunda da qələbə qazanıb finala vəsiqə qazanaq”.

Yatsek Zelinski (“Poloniya”nın baş məşqçisi): “Neftçi"dən belə güclü oyun gözləmirdim. Rəqibin "Metallist"lə oyununu izləmişdim. Bilirdik ki çətin olacaq. "Neftçi"nin əks hücumları super alındı. Rəqib bu gün bizdən daha güclü oynadı. Azərbaycan komandalarından “MKT Araz” və "İnter"ə qarşı oynamışam. Təkcə onu deyə bilərəm ki, futbolunuz getdikcə inkişaf edir. Biz Azərbaycanın ən güclü klubuna uduzduq. "Neftçi"nin heyətində oynayan perspektivli gənclər gələcək vəd edir. Hər bir məşqçi komandanızdakı 25, 19, 14 və 28 nömrəli futbolçuları (Bahodir Nasimov, Cavid İmamverdiyev, Mirhüseyn Seyidov və Emin Mehdiyev nəzərdə tutulur.) sərəncamında görmək istəyər”.
 
Cavid İmamverdiyev: "Qol vurub komandamızın qələbəsində pay sahibi olduğuma görə sevinirəm. Hamımız qələbəyə köklənmişdik. Güclü rəqibə qarşı layiqli oyun göstərib, uğur qazandıq. Bunun davamını "Paxtakor"la oyunda da gətirmək istəyirik".