Bu qış klublarımız əvvəlki transfer dönəmlərinə nisbətən daha passivdirlər. Xüsusən də Premyer Liqanın iddialıları bu baxımdan ciddi iş görmədilər.

Məsələn, “Xəzər Lənkəran” ötən mövsüm 6 ay ərzində iki dəfə heyət dəyişdiyi halda, bu qış heyətinə cəmi 5 futbolçu qatdı: Bunlardan üçü əcnəbi (ikisi Malidən), ikisi ilə yerlidir.
 
Bəzi futbolçuları ilə yollarını ayıran, bəzilərini də icarəyə verən “Neftçi” isə hələlik, ümumiyyətlə, transfer etməyib.

Çempionluğa iddialı “İnter” sadəcə, “Bakı”dan heyətinə qatdığı Əziz Quliyevlə güclənib.

“Qarabağ” Vaqif Cavadov və Elton Yaqublu, “Qəbələ” Yannik Kamanan və Elmar Baxşıyevlə kifayətlənib.

“Simurq”, “Rəvan”, “Kəpəz”, “Turan” və “Sumqayıt” yerli bazarın hesabına heyətlərini möhkəmləndiriblər.
 
Yalnız “Bakı” ənənəsinə sadiq qalaraq, həmişəki kimi, bu dəfə də Avropada kifayət qədər tanınan futbolçularla güclənib. Bir sıra yerli və əncəbi futbolçuları ilə vidalaşan “Bakı” ulduz oyunçusu Jaba ilə yollarını ayrısa da, onun yerini daha məşhur oyunçu ilə doldurdu. Belə ki, paytaxt klubu “Malaqa”, “Marsel”, “Sportinq” kimi böyük klublarda oynamış Serxio Kontrerası (Koke) heyətinə qatdı. İspaniyalı forvard qış fasiləsində ölkəmizə gələn ən bahalı futbolçudur. Məşhur “transfermarkt.de” saytı ona 1 milyon avro qiymət qoyub.

Qış dönəminin ən bahalı ikinci transferi də məhz “Bakı”ya məxsusdur. Paytaxt klubunun “Srvena Zvezda”dan aldığı Serbiya millisinin sabiq üzvü Nenad Kovaçeviçə 750 min avro qiymət qoyulub. Xorvatiyanın “Riyeka” klubundan gələn Duje Bakoviçin dəyəri 550, Sloveniyanın “Domjale” komandasından gələn Lukas Mario Horvatın dəyəri isə 350 min avrodur. Bu qiymətlər də “transfermarkt.de”yə istinadən verilib.

“Qəbələ”nin yeganə əcnəbi transferi Yannik Kamananın da hazırkı dəyəri bəllidir. İngiltərənin “Tottenhem”, Fransanın “Starasburq”, “Dijon”, “Ayaçço”, Belçikanın “Ostende”, İsveçrənin “Şaffhausen”, İsrailin “Makkabi” (Herzliya), “Makkabi” (Təl-Əviv), Türkiyənin isə “Sivasspor” və “Mersin İdmanyurdu” klublarında çıxış etmiş futbolçu 550 min avro dəyərində qiymətləndirilir. Qış dönəminin azsaylı əcnəbi transferlərindən olan Nemanya Vidakoviçin də qiyməti qeyd edilib. Belə ki, “Rəvan”ın yeni oyunçusuna 300 min avro qiymət qoyulub.

Ümumiyyətlə, klublarımızın qış transferlərindən belə başa düşmək olar ki, onlar köklü dəyişikliyə ehtiyac görməyərək, daha çox heyətin özəyini qoruyub saxlamağa çalışıblar. Yalnız Jaba kimi futbolçunun gedişinə təəssüflənmək olar. Həqiqətən də, o, nəinki “Bakı”, ümumiyyətlə, Azərbaycan çempionatı üçün dəyərli futbolçu idi. Məhz bir çox azarkeşlər stadiona braziliyalının oyununu izləmək üçün gəlirdilər.

Sonda qeyd edək ki, “transfermarkt”ın qiymətləndirmələri əksər hallarda reallıqla üst-üstə düşmür.