Premyer-Liqanın final mərhələsinin ilk turunda «Qarabağ»a məğlub olan «Xəzər Lənkəran», turnir cədvəlinin dördüncü pilləsinə yuvarlandı. Mirça Rednikin gedişindən sonra özünəməxsus oyun dəst-xəttini tamamilə itirən cənub təmsilçisi, «Qarabağ» qarşısında biabırçı çıxışla yadda qaldı. Təsəvvür edin ki, Cüneyt Biçərin komandası 90 dəqiqə ərzində Ağdam təmsilçisinin qapısı qarşısında real qol şansı əldə edə bilmədi. Çox maraqlıdı ki, komandanın belə biabırçı çıxışına rəğmən, «Xəzər Lənkəran» azarkeşləri sükunətə qərq olublar. Mirça Rednikin baş məşqçi olduğu dönəmdə komanda qalib gələndə də, məğlub olanda da mətbuatda, sosial şəbəklərdə öz fikirlərini bildirən, «Xəzər Lənkəran»ın üstun və çatışmayan cəhətlərini söyləyən azarkeşələr nədən susublar?

Maraqlıdı ki, bu məqam «Premyer-Liqa» verilişində çempionatın oyunlarını şərh edən azerifootball.com saytının baş redaktoru Erkin İbrahimovun da diqqətini cəlb edib. Dünən «İdman Azərbaycan» kanalında efirə gedən növbəti buraxılışda Erkin bəy də «Xəzər Lənkəran» azarkeşlərinin susqunluğunu qabardıb: «Daim aktiv olan, irad və təkliflərini səsləndirən «Xəzər Lənkəran» azarkeşləri sanki apatiya vəziyyətindədilər. «Xəzər Lənkəran» babırçı oyun göstərir, azarkeşlər isə susur».

Erkin bəy «Xəzər Lənkəran»ın gələcək perspektivi haqda da danışıb: «Belə oyunla komanda yəqin ki, Avropaya vəsiqə qazana bilməyəcək. Vəsiqə qazansa belə, belə oyunla Avropada nəyəsə nail ola bilməyəcək».

«Xəzər Lənkəran» ətrafında baş verən son proseslərə nəzər saldıqda həqiqətən də Erikn İbrahimovun haqlı olduğu üzə çıxır. Maraqlıdı, azarkeşlər rəhbərlikdən küsərək stadiona gəlmirlər, bəs sosial şəbəklərdə, mətbuatda nədən öz fikirlərini səsləndirmirlər? Daha bir maprqlı məqam ondan ibarətdi ki, cənublu azarkeşlərin susqunluğu Rednikin qovulduğu, azarkeşlərin narazılığının artıdığı ərəfədə, komanda rəhbərliyi ilə bir qurup azarkeşin görüşündən, azarkeşlərlə əlaqələndirci vəzifəsinin təsis olunmasından sonra başlayıb. Olmaya bu vəzifə lənkəranlı azarkeşlərin ağzını bağlayıb?