“Bakı” klubu tarixində üçüncü dəfə futbol üzrə Azərbaycan Kubokunun qalibi olub. Paytaxtın eyni adlı komandası bu dəfə finalda “Neftçi”ni məğlubiyyətə uğradıb – 2:0.

“Dalğa Arena”da keçirilmiş matç sürətli hücumlarla başlayıb. 3-cü dəqiqədə “Neftçi”nin yarımmüdafiəçisi Mirhüseyn Seyidovun uzaq məsafədən qüvvətli zərbəsi “Bakı”nın qapı tirinə tuş gəlib. “Bakı”nın hücumu isə qolla nəticələnib. 8-ci dəqiqədə qurulmuş çoxgedişli kombinasiyanı ispaniyalı hücumçu Koke qolla tamamlayıb.

Bu qoldan sonra oyunun tempi tədricən aşağı düşməyə başlayıb. Ərazi üstünlüyünə malik “Neftçi” hücumlarını daha çox sağ cinahdan qurmağa cəhd edib. Bu zaman “Bakı”nın aşağı yaş qruplarından yetişmiş cinah müdafiəçisi Elşad Manafov bu hücumların qarşısını məharətlə alıb.

“Bakı”nın əks-hücumu isə gözəl qolla nəticələnib. 28-ci dəqiqədə Xavyer Juniorun qapıya göndərdiyi top qövsvari trayektoriya cızaraq, Saşa Stamenkoviçin qoruduğu qapıya yönəlib. Qol o qədər gözlənilməz alınıb ki, Juniorun özü belə qol vurduğuna inanmayıb.

Qalan dəqiqələrdə də “Neftçi” topa daha çox yiyələnsə də, qol vura bilməyib. “Bakı”nın əks-hücumları isə daha kəsərli alınıb. İkinci hissədə meydanda gərgin anlar da yaşanıb. Hesabda geridə olan “Neftçi”nin futbolçuları bir epizodda yan xətt hakimi Elman Musayevə kəskin etiraz ediblər. Baş hakim Əliyar Ağayev buna görə Denis Silvaya sarı vərəqə göstərib. Növbəti epizodlardan birində isə flaqman fanatları meydançaya su qablarının qapaqlarını atıblar və lazer şüalarından yararlanıblar. Bir sarı vərəqəsi olan Denis Silva 80-ci dəqiqədə də kobudluğa yol verib. O, Xavyer Junioru yıxdığı üçün ikinci sarı vərəqə alaraq, meydandan qovulub.

“Neftçi” azlıqda qalmasına baxmayaraq, hücumlarını davam etdirib. 83-cü dəqiqədə “Bakı”nın futbolçusu Nenad Kovaçeviç birdən-birə yerə yıxılıb. Bundan təşfişə düşən “Bakı”nın vitse-prezidenti Yaşar Seyidov meydana daxil olub. Baş hakim isə onu texniki zonadan kənarlaşdırıb. Ümumiyyətlə, referi elə də ciddi səhvlərə yol verməyib. Onun yeganə səhvi “Bakı” futbolçularının zədə və digər bəhalərlə vaxtı uzatmasına göz yumması olub.

Beləliklə, “Bakı” 2005 və 2010-cu illərdə qazandığı Azərbaycan Kubokunu növbəti dəfə muzeyinə aparıb. Əvvəlki illərdə “zolaqlılar” “İnter” və “Xəzər Lənkəran”ı əlavə vaxtda 2:1 hesabı ilə yenmişdisə, bu dəfə kubok mübarizəsində ilk dəfə qarşılaşdığı çempion “Neftçi”ni əsas vaxtdaca 2 cavabsız qolla üstələməyi bacarıb.

Oyundan sonra Peşəkar Futbol Liqasının prezidenti Ramin Musayev və AFFA-nın vitse-prezidenti Elşad Nəsirov “Neftçi”yə medallar, “Bakı”nın kapitanı Cəmşid Məhərrəmova Azərbaycan Kubokunu, komandanın digər üzvlərinə isə medallar təqdim edib.