"İnter"in qapıçısı Georgi Lomayanın müsahibəsi

- "Xəzər Lənkəran"la qarşılaşma kifayət qədər mürəkkəb alındı. Hər iki komandanın qol vurmaq üçün şansları oldu, ancaq son nəticədə tamaşaçılar qol görmədilər. Oyun barədə fikirlərinizi bilmək istərdik..
- “Xəzər Lənkəran” kifayət qədər mürəkkəb rəqibdir və bu komandaya qarşı oynamaq həmişə çətindir. Ümumiyyətlə, “altılığ”ın finalında asan rəqiblər olmur, axı bütün komandalar səviyyə baxımından öz aralarında təqribən bərabərdir. Bazar günü baş tutan qarşılaşma çox məsuliyyətli və vacib oyun idi, ona görə ki, “Xəzər Lənkəran”ın qələbə qazanacağı təqdirdə birinci yerə şansı qalırdı. Bu matçın bizim üçün də ikinci yer uğrunda mübarizədə böyük rolu vardı. Buna görə də, matç çox əsəbi alındı.

- Matçın nəticəsini ədalətli hesab edirsinizmi?
- Düşünürəm ki, matçın gedişini bir qol həll edə bilərdi, birinci qol vuran komanda bu qarşılaşmada qələbəni qoruyub saxlayacaqdı. Ancaq heç-heçə nəticənin qanunauyğun olduğunu hesab edirəm.

- Son iki tur qaldı və “İnter”i asan olmayan oyunlar gözləyir. Artıq həftənin sonunda komanda “Qarabağ”a səfərə yollanacaq. Qarşıdakı matç barədə nə düşünürsünüz?
- Bu oyun ötən qarşılaşmadan daha çətin olacaq. Bu, Ağdam klubu üçün son şansdır, bundan başqa, onlar doğma meydançada oynayacaqlar və bu üstünlükdən mütləq istifadə etməyə çalışacaqlar.

- Son görüşlərdə komandanın hərəkətlərində sıx qrafiklə əlaqədar müəyyən yorğunluq hiss olunur. Necə düşünürsünüz, bu vəziyyət mövsümün qalan oyunlarında “İnter”ə mane olmayacaq?
- Belə alındı ki, son zamanlar biz meydançaya 3 gündən bir çıxmalı olduq və bu da belə vəziyyətin yaranmasına gətirib çıxardı. Lakin bir qədər istirahət etmək və bu matça daha yaxşı hazırlaşmaq imkanı yarandı. Ümid edirəm ki, hər şey yaxşı olacaq. Taleyimiz öz əlimizdədir, hər şey özümüzdən asılıdır.