"Xəzər Lənkəran" afrikalı legioneri Julius Vobayı transferə çıxarıb. Bu haqda komandanın vitse-prezidenti Tuyqun Nadirov məlumat verib. O bildirib ki, syerra-leoneli futbolçunun hazırlıq səviyyəsi baş məşqçini qane etmədiyindən komandanın düşərgəsindən kənarlaşdırılıb.

Maraqlıdı ki, lənkəranlılar Vobayın "ağ-yaşıllar"la müqaviləsinin bu ilin dekabrında başa çatacağını bildirsə də, futbolçu başqa söz deyir: "Mən "Əl Məsri"yə keçəndə FİFA bu barədə "Xəzər Lənkəran"a müraciət etmişdi. Lakin onlar FİFA-ya cavab verməmişdi. Bundan sonra FİFA mənim "Əl Məsri"yə keçidimə icazə verdi. Misirdə məlum olaylar səbəbindən çempionat dayandı. Buna görə də indi azad agentəm. "Xəzər Lənkəran"ın məni transferə çıxarmaq hüququ yoxdu. İstədiyim klubla danışıq apara bilərəm. Hansısa klubla anlaşdıqdan sonra "Əl Məsri" mənim transfer vərəqimi verəcək. Bu, Azərbaycan, Misir, Braziliya və ya başqa bir ölkə ola bilər. Transferə çıxarılmağımla bağlı açıqlamalar boş şeydi".

Aprelin 13-də "Xəzər Lənkəran" rəsmi saytı ilə xəbər yayaraq, Vobayın düşərgəyə qayıtdığını açıqlamışdı. Həmin xəbərdə bildirilirdi ki, FİFA-nın Mübahisələrin Həlli Palatasının qərarına əsasən, Vobayın "Xəzər Lənkəran"ın futbolçusu olduğu və onun klubla müqaviləsinin mövcudluğu faktı təsdiqlənib. Lakin afrikalı futbolçu bunun doğru olmadığını bildirir: "Onlar məni yalvarıb Azərbaycana çağırıblar. FİFA-nın məni "Xəzər Lənkəran"ın oyunçusu hesab etməsi boş şeydi. Onlardan soruşub görün əllərində belə bir sənəd var? FİFA mənim xeyrimə qərar verib və həmin qərar əlimdədi. Bundan başqa heç bir qərar qəbul olunmayb. Elə bir qərar varsa, qoysunlar ortaya. Yenə deyirəm ki, mənimlə müqavilə bağlayan klub "Əl Məsri"yə müraciət edib, transfer vərəqimi almalıdı. İstədiyim kluba keçə bilərəm. "Xəzər Lənkəran" hər gün mənə müqavilə təklif edir, amma razılaşmıram. Bir neçə gün orada məşq etdim, sonra da komandanın düşərgəsindən ayrıldım. "Xəzər Lənkəran"la heç bir bağlılığım yoxdu. FİFA "Xəzər Lənkəran"ın əleyhinə qərar verib, vəssəlam. Sadəcə, onlar məni yalvara-yalvara qaytarıblar. Bəzi təkliflər var. Adlarını açıqlamıram. Amma onu deyə bilərəm ki, Türkiyə və Azərbaycan klublarıdı".

Bütün bu söz-söhbətlərin fonunda dünən bəlli oldu ki, Vobay "Neftçi" ilə anlaşıb. "Qarabağ"ın kapitanı Rəşad Sadiqovdan sonra flaqman bu dəfə digər əzəli rəqibi "Xəzər Lənkəran"ın sabiq üzvünün keçidini həll edib.

İndi cənubluların buna reaksiyası maraqla gözlənilir. Çünki onlar Vobayın onlarla müqaviləsi, futbolçu isə azad agent olduğunu bildirir. Məhz 3 gün öncə Lənkərandan Bakıya gələn Vobay çoxdan maraq dairəsində olduğu "Neftçi" ilə budəfəki danışıqlarını müsbət yekunlaşdırıb. Odu ki, onunla rəsmi müqavilə imzalanıb. Yarımmüdafiəçinin imzaladığı rəsmi müqavilə artıq Peşəkar Futbol Liqasına da təqdim olunub.