AFFA İcraiyyə Komitəsinin üzvü Kazbek Tuayev “Qarabağ” klubunun futbolçusu Vaqif Cavadovun Azərbaycan milli komandasına qaytarılmamasına və cəzasının azaldılmamasına münasibət bildirib. Veteran futbolçu açıqlamasında Cavadovu yığmadan kənarda saxlayan baş məşqçi Berti Foqtsu qınayıb.

Eyni zamanda, Tuayev jurnalistlərin də bu məsələdə futbolçuya dəstək olmalarının vacibliyini vurğulayıb: “Belə etmək olmaz. Hətta insan insanı öldürəndə də əfv edirlər. Amma Foqts əsl azərbaycanlı futbolçunu yığmadan kənarda saxlayır. Bu məsələnin müsbət həllində siz jurnalistlərdən çox şey asılıdır. Elə yazılar yazmalısınız ki, Foqts yanlış qərarından əl çəksin”.

Tuayev vaxtilə məhz jurnalist yazısından sonra “Neftçi”də komanda yoldaşı olmuş mərhum futbolçu Anatoli Banişevskinin cəzasının qarşısını aldığını açıqlayıb. O, 1969 – 1983-cü illərdə “Sovetskiy Sport” qəzetinin futbol şöbəsinin redaktoru, veteran futbolçu Viktor Ponedelnikin xidmətlərini vurğulayıb: “O vaxtlar SSRİ Futbol Federasiyası Banişevskini diskvalifikasiya etmək istəyirdi. Buna görə Viktor Ponedelniki Azərbaycana dəvət etdim. Onun üçün nələr etmədim? Neftçalaya kimi apardım. Balıq tutdu, kürüyə qonaq oldu. Hər cür şərait yaratdım ki, Banişevski barədə yaxşı yazı yazsın, SSRİ futbolundakı xidmətlərini bir daha nümayiş etdirsin. Ponedelnik də “Sovetskiy Sport”da bir gözəl yazı yazdı. Nəticədə Banişevskini cəzalandırmadılar”.

Qeyd edək ki, AFFA Vaqif Cavadovun 2012-ci il Avropa çempionatının ötən il oktyabrın 7-də Azərbaycan və Avstriya milliləri arasında keçirilmiş seçmə qrup matçından sonra heç bir səbəb olmadan komandamızın düşərgəsini tərk etdiyini açıqlayıb. AFFA İntizam Komitəsi futbolçunu 1 il müddətinə yığmadan kənarlaşdırıb. Onu heyətinə cəlb edən “Qarabağ” isə 5000 manat cərimələnməklə yanaşı, xidmətindən 5 oyunluq məhrum olub. Berti Foqts baş məşqçi olacağı müddətdə Cavadovu bir daha yığmaya çağırmayacağını bildirib.