Bilindiyi kimi, 2007/08 mövsümündə «Xəzər Lənkəran»ın şərəfini qorumuş Valeri Abramidze sabiq komandası ilə problem yaşayıb. Klubun ziyafət gecəsində qonaqlarla gələn qızlardan birini rəqsə dəvət etdiyi üçün rəhbərliyin qəzəbinə tuş gələn gürcü legioner qovulmuşdu. Hazırda «İnter»in formasını geyinən müdafiəçi FİFA-ya şikayət məktubu göndərəndən sonra «XL»la üzlüşmüşdü.

Ondan Romulo Sivanonun məlum hərəkətinə münasibətini öyrəndik: «Lənkəran klubundan altı xal siliməsinə təəssüflənirəm. Bu, komandanı çox geri saldı. Bu vaxta qədər çəkdikləri zəhmət və əziyyət hədər getdi. FİFA qaydalar çərçivəsində sanksiya tətbiq edir. Beynəlxalq qurumun qoyduğu tələblərə əməl etmək lazımdı. Əməl etməyəndə isə belə olur. O vaxt «Xəzər Lənkəran»dan gedəndə, mənim də başıma belə bir iş gəlmişdi. Mənlə klub arasında baş verənlər indikindən fərqli idi. Lənkərandan gedəndən 6 ay sonra komandaya keçəndə «Xəzər» rəhbərliyi pul istədi. Dedilər ki, bizimlə daha birillik müqavilən var. Əslində isə müqaviləm qurtarmışdı. Müqaviləmin surətini agentimdən alıb, FİFA-ya şikayət edəcəyimi dedim. Ondan sonra geri çəkilməyəcəyimi görüb, transfer vərəqəmi verdilər. Yoxsa başqa kluba keçə bilməzdim. Romulonun məsələsində vaxtında pul ödənilməyib. FİFA belə şeylərdə çox diqqətlidi. Xüsusilə futbolçunun pulu verilməyəndə beynəlxalq qurum klubu deyil, oyunçunu müdafiə edir. Ola bilsin ki, bunun qarşılığında futbolçunun agenti FİFA-dan «Xəzər Lənkəran»dan altı xal silinməsini tələb edib. Ən doğrusu, futbolçunun pulu vaxtında ödəyib, indi belə bir hadisəylə rastalaşmamaq idi».