Futbol üzrə Unibank Premyer Liqasında XXX tura aprelin 28-də keçirilmiş 2 oyunla start verilib. Günün qarşılaşmaları ikinci “6-lığ”a təsadüf edib.

Daha böyük maraq sonuncu pillədə qərarlaşan “Sumqayıt”ın özündən 1 pillə irəlidəki “Turan”la Tovuzda keçirdiyi oyuna yönəlib. Bu görüşdə “Turan” qalib gəlsəydi, “Sumqayıt”ın Premyer Liqanı tərk edəcəyi rəsmiləşəcəkdi. Lakin matç heç-heçə ilə nəticələnib.

Premyer Liqanın daha bir debütantı “Rəvan” isə zəngin tarixə malik “Kəpəz”i darmadağın edib. Gəncə təmsilçisinin uğursuz oyun sərgilədiyini komandanın baş məşqçisi Fuad İsmayılov da oyundan sonra etiraf edib: “Bu komanda tarixinin ən pis oyununu nümayiş etdirdi. 1:5 hesablı məğlubiyyət bizim üçün qara ləkədir. Çətin ki, yaddaşlardan silinsin”.

28 aprel (şənbə)

“Turan” (Tovuz) – “Sumqayıt”
Qollar: Aleksandr Qoqoberişvili, 69-penalti ilə - Orxan Əliyev, 59

“Rəvan” (Bakı) – “Kəpəz” (Gəncə) – 5:1
Qollar: Nemanya Vidakoviç, 24. Kristian Toress, 56; 90+3. Ramazan Abbasov, 71; 84 - Yuri Fomenko, 75
Qırmızı vərəqə: Mesallah Eslam, 42 (“Kəpəz”)

Tura aprelin 29-da keçiriləcək daha 4 oyunla yekun vurulacaq:

17:00. “Qəbələ” – “Bakı”
Qəbələ şəhər stadionu.

17:00. “Neftçi” (Bakı) – “Qarabağ” (Ağdam)
Bakı, İsmət Qayıbov adına Bakıxanov qəsəbə stadionu.

17:00. “İnter” (Bakı) – “Xəzər Lənkəran”
Bakı, “Şəfa” stadionu.

18:15. AZAL (Bakı) – “Simurq” (Zaqatala)
Bakı, “AZAL Arena”.